ما تزي فيك قصيدة من ألف سطر *** وما يبردشي جني حتى ديوان
الأمين قلب لمغاربة عليك تعمر*** حكايتك ما ننساوها طول الزمان
حنا فصحرانا نت قلت مستعمر*** واش مدوخ ولا شارب شي كسان
الناس كاملة على السلم تدور*** ونت اليوم راك حاب تشعـــل نيران
عييت فالقاموس نشرح ونعبر*** مالقيتشي ميوتيك إلا اســم الشيطان
شبعوك دينار وشعبهم عيش فالفقر *** يا أعود بالله من بعض الجيـران
من عملنا فيه الخير ورانا كيحفـر*** سال التاريخ يعطيك خبار البلدان
المغرب أمة راه تاريخ مجـــدر *** آثارها راه واصل حتى للسودان
حياة الأمة ما يتقس بسنة وشهر*** هاذي راهي قرون في عمق الزمان
الأمين اذا صح بالحق كــتهضر*** قولها لإسرائيل راك تعرف المكـان
لكن نت بيدق تابع ناس الشـــر*** قولي كم خديت دينار من فم الجيعان
تلفت في لكلام كعطاوك ما تفطر*** كليت بيدك بزوج وتركت العيدان
غير شبعت لسانك سبق الفكـــر*** بقيت تهيتر في الكلام بلا ميــزان
الأممية راك طيحتها في منحدر*** رسالتك تودرت و خطات العنوان
المغرب بنيان مرصوص بلحجر***أرضه مرفوعة ما تخاف الفيضان
شعب ايمانه قوي كالقنديل منور *** شعاره ديما الله الوطن والسلطان
إمارة المؤمنين كالسور متسـور*** على المغرب دايرة أربعة أركـــان
ما يوسوسنا جن لا إبليس عور*** سلاحنا ديما هي الصلاة والقـــرآن
من جانا بالخير ربي فيه يكثــر*** فوق رأسنا الرفعوه بالهمة والشان
ونوكلو االله لمن قصدنا بالشــر*** شره يرجع ليه ولو مشى لليابــان
هذا راه الواقع مهوش مـــزور*** درس فالتاريخ وتعرف باللي كـان
ارض السلم والأمن قدر مقدر*** ربي مبارك فيه خيره على للــــوان
جبل وسهل مع الصحراء والبحر*** المغرب وطني عزيز نفديه بلعيان
زاد الكرم بالسادس شريف ومحرر *** نطلبوا الله يبارك فعمر السلطان
والختم الصلاة على خير البشر*** صلاة وسلام عليك ياطه العدنان
بلخياطي الجرسيف نت ليـه نعر*** يا ربي طالبك يا سيدي رحمـــان
تحفظ المغرب من الحدجة والمر*** وهدي وللا هلك دوك العديـــان
نت ربي تعلم بالمستقبل وحاضر*** رنا طالبينك الكل كبار وصبيان
تحية زجلية للأخت الأستاذة كريمة مهندي لك كل التقدير والإحترام ولكل رجال التعليم الغيورين في هذا البلد الأمين على الثقافة والتعليم والإبداع .
تحية تقدير للاستاذ المبدع بلخياطي الجرسيفي
قصيدة رائعة
دوما متالق يا استاذ