”حرقوها ونامو ”(قصيدة زجلية)

أنا بغيت في جرسيف نعمل تجارة ***جــات النار وكلات لي ما نكسب

ايام عمري وشقاية راح خصارة *** واش نعمل وندير الشكوى للرب

لا من يساعد بقاو غيــر الهدارة ***رجعنا حكايات في الزنقة والدرب

نقولو ونعاودوها بصريح العبارة *** يا ويح للي شاب راسو وما تايب

ردو اللوم علينا في كل خسارة *** اش اداكم للسوق درتوها مضرب

سوق سبوعي ماشي ديبو لتمراة *** من ضرباته يديه ما لازم يغضب

لاخير فيهم يعرفو غ جيب أرى *** ميحنوعلى منكوب ينظرو بالجانب

ما بقاو مسؤولين غير السمسارة *** يبيعو المواطن حتى بتبخرة الشب

ذاك المعروف عليه دارو دوارة *** قولو بالله منين جاهــم هاذ الحــب

والمسكين غي خليه ماليه حزارة *** يعيش ولا يموت يخسر أو يكسب

ما نسالو فيه هو ولا ناس الحارة *** الا ورقة من اجل صندوق المكتب

يستغلو هم الناس في كسب دوارة*** ألم المحروق داروه دعاية للحزب

دفن روحك مع رزقك في المقبرة *** اذا معندك لا اكتاف ولا منصــب

هذا الشيء راه معروف بلا امارة*** حتى لحمق راه عــارف ومجرب

وين مريت تشـــوف غيرالقــدارة *** ما تختار في اولاد كلبة غير الكلب

حتى اصحاب الفن رجعو شفارة *** فالكلمات والألحان وقرصنة كتـب

واش تترجى من الجاهل اشارة *** الا اشارة الكذب والسرقة والنهـب

راه عندنا ما بقاو غير الحكارة *** غير من شبع أموال علينا يتقلــــب

تلقى للي مكان يكسب حمـارة *** راه اليوم الكات كات دايرها مركب

بعد سكن العشة راه باني عمارة *** بنيها بالرشوة وللا بتجارة قنـــب

ياويل من لحرام شاري سيــارة *** وزاد بجنبو فاسدة وكيوس الشرب

اما التاجرللي تعب في التجارة *** بعد حرقوها نامو موتى ذا القـلب

الناظم يشد على يديكم بحرارة *** يطلب الله يعينكم على واش كتـب

ويجعلها للذنوب عفو و كفــارة *** ويعوض عليكم بخيردايم مينضب