الله وكــيلــنــا (قصيدة زجلية)

يوم نتخابنا قاري وقلنا ولــد فلان *** في الأصل مجدر والخصال المكمولة

خوا الدرب وراح خلاها عــريان *** لشيء قوم من ظن كانت مسؤولـــــة

كلها يدعي الصدق وفعله خـــوان *** وللي تكلم يسكــــتوه بقسيم الفــــولـة

مزالين لليوم يصولو في الميــــدان *** من حدود الجل زيد حتى الغفــولـــة

من حدود لمريجة حتى لولجمــــان *** جرسيفنا مـزال في كرش الغـولــة

لا بنية لصرف صحي ولا طرقان *** اجي لبخوشة تدي الصورة منقولة

سواقي بالكودرون كمثل البستــان *** راه مخصنا غير الثيران وعجولة

هذي مهزلة ما صرات فشي زمان *** المسؤولين واش نايمين ولا خردولة

الكل أكل حقه راه مغمض لعيان *** ذكرت الشعب تنسى وترجع مقبولة

واليوم الحملة كلها رافـــع عنـوان *** بحروف الحق لكن بالظلم مشكولــة

كم من مول المال ولى من لعيان *** نس كان خماس في جنان البقولـة

رجع اليوم من كان راعي للجديان *** صورهم في الجو صبحت محمولة

رانا لبسنا الكتان و نسينـــا مكــان *** ويلي ويلي على رجال البطولـــة

ولد الأصل ما نبدلوشي بالرعيان *** ماعمرو المال بيــه تشري رجولــة

العرق دساس رد بالـك يا فــــلان *** من تامنه تلقاه يطمع فــي سبــولـــة

خايف الجوع في أفكاره جيعـان *** وخ يكسب أموال عين و منقــولــــة

السارح فالفكر ما نقصد رعيـان *** لأفكار الرعيان بياتي مرســولــة

العلم والأخلاق راه مليهم ثمـــان *** صاحبهم راه مرفوع بهم للعــــلا

اما صاحب المال يكملو يشيــان *** إلا من كسبه حلال كحـــب المولــى

بلك تتغر بالجاه ومال يا انســـان *** وتأكل حق لعباد برشوة وعمولــة

الله عط أمثال فقصص القــــرآن *** قصة قارون وفرعون وعاد الأولى

عمى البصيرة للي مخد البرهان *** كم أعمى ما يشوف وعينه محلولة

تعمى البصيرة راه ما تعمى لعيان*** ربي نجينا وجعل الدعـــاء مقبولــة

ونجح من يخدم صالـح ذا الوطن *** وهلك الظلام صبح قبل القيلــولــــة

نت عالم بالنية وعالم بللي كـــان *** حنا ضعاف وكلناك يا رب الــعــلا